ရန်ကုန်မြို့သစ်၏ အခြေခံအဆောက်အအုံစီမံကိန်းများ ဆောင်ရွက်ရန် ထိုင်းနှင့်အိန္ဒိယနိုင်ငံ အခြေစိုက်ကုမ္ပဏီနှစ်ခုကို ရွေးချယ်ထား

Myanmar Builder Guide 26 Aug 2019

ထိုင်းနှင့်အိန္ဒိယနိုင်ငံအခြေစိုက်ကုမ္ပဏီနှစ်ခုကို ရန်ကုန်မြို့သစ်၏ အခြေခံအဆောက်အအုံစီမံကိန်းများ ဆောင်ရွက်ရန်ရွေးချယ်ကြောင်း ရန်ကုန်မြို့သစ်ဖွံ့ဖြိုးရေးကုမ္ပဏီ (NYDC) က ထုတ်ပြန်ထားသည်။

Power Supply and Distribution ကဏ္႑အတွက် ထိုင်းအခြေစိုက် PTT Group ကို ရွေးချယ်ခ့ဲပြီးတော့ Natural Gas Supply and Distribution ကဏ္႑အတွက် အိန္ဒိယနိုင်ငံအခြေစိုက် IGL Consortium ကို အကောင်းဆုံးနှင့်အသင့်လျော်ဆုံးကုမ္ပဏီအဖြစ် ရွေးချယ်ခဲ့ကြောင်းသိရသည်။

အဆိုပါရွေးချယ်မှုတွင် ပွင့်လင်းမြင်သာမှုရှိရှိ ရွေးချယ်ရန် စင်ကာပူနိုင်ငံ၏ ကုန်သွယ်ရေးနှင့် စက်မှု၀န်ကြီးဌာနလက်အောက်ရှိ Monetary Authority of Singapore နှင့် Infrastructure Asia (IA) အဖွဲ့များဖြင့်ပူးပေါင်းပြီး အခြေခံအဆောက်အအုံစီမံကိန်းများအတွက် စိတ်၀င်စားမှု အဆိုပြုလွှာ (EOI)တင်သွင်းသည့်ကုမ္ပဏီ အဖွဲ့အစည်း ၄၅ ခုအနက်မှ အကောင်းဆုံး၊ အသင့်လျော်ဆုံးအရည်အချင်းပြည့်မီသည့် ကုမ္ပဏီများကိုရွေးချယ် ခဲ့ကြောင်းသိရသည်။

ရန်ကုန်မြို့သစ်စီမံကိန်း တစ်ခုလုံးကို ခြုံငုံကြည့်ရှုအကဲဖြတ်မှု (Holistic Assessment) များပါ၀င်သည့် နည်းပညာအတွေ့အကြုံ (Technical Experience)၊ နည်းပညာစွမ်းဆောင်ရည် (Technical Capacity) နှင့် ဘဏ္႑ာရေးအရခိုင်မာမှု (Financial Capacity)တို့ကို အခြေခံပြီး အဆင့်ဆင့် စိစစ်အမှတ်ပေး (Gated) စနစ်ဖြင့် ကုမ္ပဏီများကို အကဲဖြတ်ကြောင်း NYDC က ဆို သည်။

NYDC Challenge လုပ်ငန်းစဉ်စတင်ရန် စိတ်၀င်စားမှုအဆိုပြုလွှာ EOI ခေါ်ယူမှုကို ၂၀၁၉ ဖေဖော်ဝါ ရီ ဒုတိယပတ်ကတည်းက ခေါ်ယူမှုလုပ်ခဲ့ပြီး ရန်ကုန်မြို့သစ် ပထမအဆင့် အခြေခံအဆောက်အအုံ စီမံကိန်းကဏ္႑များအရ Power Supply and Distribution, Natural Gas Supply and Distribution, Cyber Connectivity, Public Transport, Waste Management နှင့် Convention Center များအနက်မှ ကဏ္႑ရပ်နှစ်ခုအတွက် အဆိုပါကုမ္ပဏီ အဖွဲ့အစည်းနှစ်ခုကို စတင်ရွေးချယ်ခဲ့ခြင်းဖြစ်သည်။

ရွေးချယ်ရန် ကျန်ရှိသည့် ကဏ္႑များအနက် Cyber Connectivity Infrastructure ကဏ္႑အတွက် စိစစ်နေကြောင်းသိရသည်။

 

Ref & Photo Credit : Myanmar Builder Guide 

Posted By : Thazin Hnin Htet (www.findpropertymm.com)